Thursday, December 6, 2007

වළගම්බා රජුගේ පියා

නිසි තොරතුරක් සොයාගැනීමට තරම් යෙදවීමට කාලයක් පසුගිය මාස කීපය තුළ නොවූයෙන් මෙම කාර්යය මදකට කල්මැරිණි. නමුත් හදිසියේම එක් පොතක් සටහන් දැක මෙහි ලිවීමට යමක් සොයා ගතිමි.

මීට පෙර ඇති ලිපියේ නිවැරදි කිරීමක් ලෙස දැක්වූ වළගම්බා රජුගේ පියා පිළිබඳ තොරතුර නිවැරදිවම දැනගත හැකිවිය.

වළගම්බා නමින් රජවී ඇත්තේ සද්ධාතිස්ස රජතුමාගේ බාල පුත්‍රයාය. නමුත් ඔහුගේත් පියාගේත් රාජ්‍ය කාල අතර ලජ්ජිතිස්ස සහ ඛල්ලාඨනාග යන රජවරුන් රට පාලනය කර ඇත.


කෙසේ නමුත් මෙම රාජවලිය මහාවංශය‍ට අනුව සඳහන් වූවකි. මේ පිළිබඳ වැඩි දුර තොරතුරු නුදුරේදීම මෙිහ ලියැවෙනු ඇත.

මෙමගින් "අප දන්නා කෙටි සටහන්" ලිපිය, එක් කාරණයක් හැර (වළගම්බා රජුගේ පුත්‍රයා මහසෙන් රජු බව), තව දුරටත් වලංගුවනු ඇත.

Wednesday, July 25, 2007

නිවැරදි කිරීමයි...!

වළගම්බා රජු පිළිබඳ අන්තර්ජාලයේ ඇත්තේ මොනවාදැයි විමසද්දී මට පහත සඳහන් කප්රුක අඩවියේ යොමුව ලැබුණි.

http://www.lanka.info/Sri_Lanka/ancientKings.jsp

(සෙවුම් යන්ත්‍රය: ගූගල් සෙවුම් පදය: walagamba දිනය: 2007/07/25)

මෙහි ශ්‍රී ලංකාවේ රාජාවලිය දක්වා ඇත.

මේ අනුව නම්, මා කළින් සඳහන් කළ "අප දන්නා කෙටි සටහන්" නමින් පලවූ ලිපියේ අවසාන කොටසේ සඳහන් කළ කාරණයක් වැරදි බව පෙනීයයි. ඒ නම් මහසෙන් රජු, වළගම්බා රජුගේ පුත්‍රයා හැටියට සඳහන් කිරීමයි. තවදුරටත් සොයාබලා නිවැරදි කර ඉදිරියේදී මෙහි සටහන් වනු ඇති. යම් අයෙක් මෙහි තොරතුරු සොයා, මේ හේතුව උඩ අපහසුතාවයට පත්වී නම්, ඒ ගැන බලවත් කණගාටුව ප්‍රකාශ කරමු.

Sunday, July 22, 2007

අප දන්නා කෙටි සටහන්

පහත සටහන් වන්නේ අප සියළුදෙනාම පාහේ වළගම්බා රජු පිළිබඳව අසා දැන ඇති කරුණු කිහිපයකි. මේවා පත පොතේ මෙන්ම ජනප්‍රවාදයේද ඇති රසබර කතා පුවත් වේ. මෙම පර්යේෂනයේදී අප හඹා යන්නේ මෙම කරුණු ඔස්සේය.

1. අනුරාධපුර යුගය.
2. සොළී/චෝල ආක්‍රමණය.
3. වසර 12ක් සැඟව සිට සේනා සංවිධානය කර නැවත සිරිලක රජකමට පත් වීම.
3.1 සිරිලක දෙවරක් රජ වීම.
4. සතුරු ආක්‍රමණය හමුවේ රජු පලායද්දී ගිරි නම් නිඝණ්ඨයා මහා කළු සිංහලයා පළා යන බවට අවඥා කළ බැවින් ඔහුව මරණයට පත් කිරීම.
4.1 පසුව රජවූ කල එම ස්ථානයේ අභයගිරි මහා චෛත්‍යය කරවීම.
5. සතුරු ආක්‍රමණය හමුවේ රජු පලායද්දී, රථයේ බර වැඩිවී වේගයෙන් යා නොහීයි බියෙන් සෝමා දේවී නම් රජුගේ බිසව රථයෙන් බැස සොළී/චෝල හමුදාවට යටත් වීම.
5.1 පසුව රජවූ කල තම බිසව රථයෙන් බැස ගිය ස්ථානයේ සෝමාවතී මහා චෛත්‍යය කරවීම.
6. සොළී/චෝල ආක්‍රමණය නිසා දිවයිනේ වත්මන් මධ්‍යම, දකුණු, සබරගමු, බස්නාහිර, ඌව ආදී අනුරාධපුරයෙන් දකුණුදිග පළාත්වල සැඟව සිට සේනා සංවිධානය කිරීම.
6.1 පසුව රජවූ කල එම සියළුම ස්ථානවල විහාරාරාම කරවීම.
7. බැමිනිතියා සාය.
8. එතෙක් කටපාඩමින් පවත්වාගෙන ආ බුදු දහම මාතලේ අළුවිහාරයේදී ග්‍රන්ථාරූඪ කරවීම.

මා මෙම පර්යේෂණයට යොමු කළ තවත් ඉතාම වැදගත් කරුණකි. ඉහත සඳහන් පරිදි අනේක විධ හැලහැප්පීම් මධ්‍යයේ (සතුරු ආක්‍රමණ, නියංසාය ආදී) රට ආර්ථිකය, ජීවන තත්වය කෙසේනම් කඩා වැටෙන්නට ඇතිද? ඒ සුළු කාලයකටත් නොවේ.

මේ සියළ්ල හමුවේ නැවත රජබවට පත්වී, වසර 2ක් වැනි කෙටි කාල පරාසයකදී අභයගිරි මහා චෛත්‍යය වැනි විශාල ගොඩනැගීමක් කරවීමට නම්, එම වසර 2 තුළ රට නැවත තිබුණාටත් වඩා සශ්‍රීකවී තිබිය යුතුය. ආර්ථිකය, මිල-මුදල්, කෘෂිකර්මාන්තය, තාක්ෂණය, ශ්‍රමය අතින් දෙවසරකදී මෙම පුනුරුප්පත්තිය ලැබීමට කුමන සාධක මුල් වීද?

සටහන්: වළගම්බා රජුගෙන් පසුව රජ වන්නේ ඔහුගේ පුත් මහසෙන් රජුය. එතුමන් වටා බැඳීඇති කතන්දර තවත් බොහෝය. මහා පරිමාණ වැව් 16කුත්, ඇළහැර ඇළත් කරවූ මෙතුමා, මින්නේරි දෙවියන් ලෙසින් අදටත්, වසර 2000කට පමණ පසුවත්, නුවරකලාවියේ මිනිසුන් අතින් වැඳුම් පිදුම් ලබයි. මෙම පියපුතු දෙපල දෙස විමසිලිවන්ත ඇසින් බැලූ කල අති විශ්මය ජනක කතා පුවතක් ලෙස පෙනීයයි. ඉදිරියේදී විස්තරාත්මක තොරතුරු මෙහි සටහන් වනු ඇත.

Tuesday, July 3, 2007

පර්යේෂණය | The Research

පළමුවන සියවසේ සිරිලක රජකම් කළ වළගම්බා රජතුමා පිළිබඳ අපට අසන්නට ලැබෙන්නේ, මෙරට රජකළ අනෙකුත් රජවරුන් ගැන අසන්නට ඇතිවාට වඩා වෙනස් වූත් - අපූර්ව වූත් - විශ්මයජනක වූත් කතා සමූහයකි. එයට අමතරව, ශ්‍රී ලංකාවේ කුමන ප්‍රදේශයකට ගියද, වළගම්බා රජතුමන් විසින් කරවන ලදැයි කියැවෙන පන්සලක් සොයාගත නොහැකි නම්, ඔබ සිටින්නේ ශ්‍රී ලංකාවේමදැයි විපරම් කර බලන්නේ නම් මැනවි.

එතුමාගේ විශ්ම කර්ම ක්‍රියාකාරකම් මෙතැකැයි කියා එක්කාසු කිරීමට මා ගන්නා උත්සාහයක පළමු පියවරයි මේ.


මේ දැක්වෙන්නේ අනුරාධපුරයේ පිහිටා ඇති එතුමන් විසින් කරවන ලද "අභයගිරි" මහා දාගැබයි. සොළීන් මෙරටින් පලවාහැර දෙවැනිවරටත් රජවීමෙන් අනතුරුව ඉදිකරන ලද මෙම දාගැබ වටාද අපූරු කතන්දර රැසක් බිහිවී ඇත. ඒවාද එකින් එක ගෙන මෙහි අන්තර්ගත කර අවසනෙයේදී (හැකිතාක් දුරට) පරිපූර්ණවූ වෙබ් අඩවියක් වළගම්බා රජතුමා පිළිබඳ කිරීම මෙහි අවසාන අභිප්‍රාය වේ.

ප්‍රේක්ෂක ප්‍රතිචාර (Comments) නිරතුරුව බලාපොරොත්තු වෙමි. වළගම්බා රජතුමා කරවන ලදැයි කියැවෙන ඔබ දන්නා පන්සල් පිළිබඳ තොරතුරු වෙතොත් srishanu2@gmail විලිපිනයට එවන මෙන් කරුණාවෙන් ඉල්ලා සිටිමි. ඔබගේ නමද සහිතව ඒවා මෙහි පළ කෙරෙනු ඇත.

මූලික අදියර වශයෙන් පොත පත ඇසුරින් හා පහසු මාර්ග ඔස්සේ තොරතුරු එක්රැස් කිරීමට බලාපොරොත්තවන අතර, සැළකිය යුතු මට්ටමකට පැමිණි පසු, ක්ෂේත්‍ර සංචාර කිරීමෙන්ද තොරතුරු එක්රැස් කිරීමට බපාපොරොත්තු වෙමි.